HZ Qabel Inghalaq il-Bieb

Il-bieb hu simbolu ta’ firda għax jifred naħa minn oħra. Imma meta ngħaddu minn quddiem bieb magħluq ta’ xi dar, qatt jgħaddilna minn moħħna kemm misteri setgħu seħħew minn dak il-bieb ‘il ġewwa? U kemm stejjer ta’ ferħ jew ta’ niket għandu x’jirrakkonta dak il-bieb?

Dan hu li l-awtur jirrakkonta f’dan il-rumnaz.

Darba waħda, waqt passiġġata ma’ wliedu, Maurice jgħaddi minn quddiem id-dar fejn kien twieled, trabba’ u għex għal numru ta’ snin. Il-mistoqsijiet ta’ Kevin u Helga jiħduh lura lejn żmien tfulitu u żgħożitu, li hu kien qatta’ wara dak il-bieb.

Illum dik id-dar bil-bieb magħluq għandha dehra ta’ abbandun, iżda l-istejjer li seħħew fiha għadhom ħajjin: stejjer ta’ mħabba, ferħ, niket, qtigħ il-qalb, tjubija, korla, kif ukoll ta’ nuqqas ta’ ftehim … stejjer li wara kollox iseħħu tista’ tgħid f’kull familja.

Bħal dejjem, Alfred Massa, bil-mod narrattiv li sirna nidentifikaw miegħu, jagħti tagħrif lill-qarrej dwar dak kollu li fuq medda ta’ snin seħħ wara dak il-bieb … illum mitluq u maħmuġ … b’dehra ta’ stmerrija … u fl-istess ħin misterjuża.