Pietru il-ħalliel tal-Birgu

Fil-ħemda ta’ dak il-lejl, ħlief għall-inħir ġej minn fuq, Pietru kien kalm, jikkonċentra fuq li kien qed jagħmel. Għalhekk mhux ta’ b’xejn li ħass qalbu tieqaf meta minn eżatt wara rasu sema’ bħal daħk ta’ tfajla kemm kemm jinstema’.

Dar fil-pront u minnufih poġġa l-pala t’idu fuq ħalqha sakemm bdiet tagħti ’l isfel b’rasha għal ħafna drabi, wara li qrib ħafna ta’ wiċċha qalilha, “Jekk tagħmel l-iċken ħoss nitfgħek fl-ixkora u nitfagħha bik b’kollox f’qiegħ il-baħar!” Meta ħalqha kien ħieles u setgħet titkellem, qaltlu “Naf li m’għandekx xkora, għax ili nsegwik mit-tieqa, u mill-ewwel indunajt x’kellek f’moħħok.”

Induna li kienet qed titbissem lejh u għajnejha kienu f’tiegħu. Pietru ma setax jemmen lil widnejh. Rosaria neħħietlu idu u reġgħet b’leħen baxx, “M’għandekx għalfejn tibża’, għax kulħadd rieqed.”

Pietru ma setax ilissen kelma. Wara ftit kompliet, “Imma rajtek tiela’ mal-ħajt. Stħajjiltek xadina u tlabt għalik f’qalbi biex tasal sal-bejt.”