Widnet il-baħar u stejjer oħra
F’din il-ġabra ġdida ta’ novelli, Joe Friggieri jinseġ tapezzerija mlewna ta’ karattri minn kull sfera tal-ħajja f ’ambjenti u żminijiet differenti. Miktubin b’Malti sabiħ u mżewqin bi djalogu ħaj u laqtiet umoristiċi, l-istejjer fihom ukoll element qawwi ta’ misteru u ħafna sorpriżi, li juru li l-ħajja rari tiżviluppa kif nistennewha jew kif nixtiquha.
“L-ewwel impressjoni li tieħu meta tibda taqra dawn l-istejjer hija li l-awtur qiegħed qabelxejn jieħu gost jirrakkonta. Tant hu hekk, li minkejja l-qosor tagħhom, ħafna drabi dawn l-istejjer huma rrakkontati b’ton poetiku, bi xbihat li jżejnu l-istorja bħal pitturi ċkejkna kkuluriti li jħallu impressjoni qawwija fuq min qed jaqra. Il-gost tar-rakkont jidher ukoll fil-fatt li diversi drabi Joe Friggieri jagħti storja fi storja, b’uħud mill-persunaġġi tiegħu jirrakkuntaw bl-istess gost li qiegħed jirrakkonta hu.” – Immanuel Mifsud