Ġimgħa, Sibt u Ħadd

Ġimgħa, Sibt u Ħadd: ir-rumanz rebbieħ tal-ewwel premju Konkors Letterarju għal Rumanzi għaż-Żgħażagħ

Rumanz ‘young adult’ li jmiss l-esperjenzi tal-ħajja taż-żgħożija tal-lum: minn Paceville, għat-tfajliet, għar-relazzjonijiet – ta’ malajr u mhux -, għall-avvenimenti mhux mistennija li kapaċi, f’weekend wieħed, jibdlulek ħajtek.

Il-Ġimgħa 17.30

Amanda telqitu … Kienu ilhom xahrejn u biċċa flimkien. Minn dakinhar li qaltlu d-“daqshekk” beda jimmarka l-ġranet waħda waħda fuq il-kalendarju. Sakemm isib tfajla oħra.

Is-Sibt 02.00

Dwal, dlam, dwal, dlam, dawl, dlam, dwal tad-disco jduru fid-dlam u jikxfu d-dellijiet ta’ rjus jiżfnu mrassin taħt l-arja kkundizzjonata. Taħbit tal-qalb jirrima mar-ritmu tal-mużika. Isfar, aħmar, oranġjo, vjola. Dlam. Blu, aħdar, roża. Teptip ta’ dawl. Ritmu bl-art tivvibra u l-ispeakers joqomsu mal-mużika li trid tisplodi minnhom, u d-dħaħen jaħbu l-iġsma jiżfnu.

Il-Ħadd

Il-Ħadd. Reġa’ bilqiegħda, iħares lejn il-ponn t’idu, minnha d-demm iqattar fl-art, josserva l-pala tal-id mimlija linji rqaq, jidhru bilkemm, imħaffrin, kważi bla kulur. Hemm linji żgħar imma hemm anki linji twal it-tul ta’ idu. Għajnejh jimxu mal-linji rqaq, jintilfu, jitgerfxu, u jħoss il-linji jdawruh u jaqfluh bħal dubbiena maqbuda m’għanqbuta.