Karma Red

Karma Red hi l-istorja ta’ Jade, tfajla ta’ erbatax-il sena, żeffiena u mimlija enerġija. Ir-rumanz jibda fl-aħħar tas-sajf, fil-bitħa tan-nanna, fejn naraw lil Jade u lill-kuġin tagħha Jamie jiktbu diski ġodda u jirrekordjawhom kif jafu huma. Iżda Jade kellha interessi oħra li ħadu post il-bitħa tannanna. Kellha date ma’ student Taljan, Mattia, li flimkien ma’ ħabibu Luke jintroduċiha ma’ post sigriet jismu Zeus – teatru abbandunat fejn kienu jiltaqgħu Luke u l-klikka tiegħu.

Is-sitwazzjoni fid-dar ta’ Jade bdiet tħallilha ċertu vojt. Missierha daħħal is-sieħba l-ġdida tiegħu Natalie d-dar, filwaqt li ommha kien ser ikollha tarbija minn raġel ieħor. Il-vojt imlietu billi bdiet tiffrekwenta Zeus. Iżda minn ħolma romantika, Jade sabet ruħha f’avventuri ta’ riskji li qatt qabel ma kienet misset magħhom.

Bejn Natalie u Jade tinħoloq relazzjoni speċjali, li tgħinhom jaraw il-ħajja minn lenti differenti mibnija fuq il-kuraġġ u l-imħabba.
Karma Red jirrifletti l-effetti tal-għażliet tagħna (karma) u l-mod ta’ kif inħarsu lejhom. Jade għażlet li tħares lejhom b’kulur aħmar, sinonimu mal-kuraġġ, rieda u l-imħabba. Għaldaqstant Karma Red.