Marta Bint id-Deffien tal-Pesta L-Ewwel Ktieb

F’maltempata qawwija fil-lejl tal-15 ta’ Frar Sidor il-baħri jiġi offrut somma flus għal biċċa xogħol u jiskopri li kellu jidfen katavru. Il-qattiel jinduna li l-mejjet ma kienx il-vittma li tassew xtaq joqtol. Sidor jibqa’ jgħix fil-biża’ li jitqies bħala kompliċi f’dan l-intriċċ.

Fuq l-ixprunara Enrichetta tal-Kaptan Nerik Mazara jittella’ priġunier li juri li jaf lil Sidor u minħabba fih Sidor ipatti qares, tant li jsir jobgħod lill-imgħallem tiegħu, u minn hawn jinbet ħafna inkwiet bejniethom. Marta, bint Sidor, u Luċjanu, iben Nerik, isiru jħobbu lil xulxin minkejja li l-ġenituri tagħhom jagħmlu minn kollox biex din l-imħabba tisfaxxa.

Ġovanna, bint Nerik, tinsab misruqa u maqfula f’sotterran fi Sqallija. Sidor isibha, iżda meta hu u missierha jmorru għaliha ma jsibuhiex hemm. Sidor jispiċċa fil-ħabs tal-Inkwiżitur, iżda bintu Marta jirnexxilha teħles lil Ġovanna u lilu. Iżda kif tispiċċa Ġovanna? U xi jsir mit-tarbija tagħha?

Fin-nofs jidħol dejjem Makarju, assassin u viljakk. Taħt il-figura falza tal-ġardinar tal-Ħakem jiġi Malta biex iwettaq vendetta mill-għedewwa tiegħu u jnibbet il-mibegħda f’Sidor lejn il-Kaptan Nerik u familtu. Iżda min hu fil-verità Makarju? U għaliex jaħbi l-identità proprja tiegħu?
Fil-ġrajja jidħlu Rebekka, in-neputija tal-infami Makarju, u ħuh il-Kavallier Klawdju, bniedem mill-aktar onest u maħbub minn kulħadd. Dawn it-tlieta jirsistu b’modi differenti biex jinħeles mill-ħabs l-ispiżjar, li kien akkużat bil-qtil ta’ Ġovanna minflok Makarju.

Sidor u Makarju jikkonġuraw bejniethom biex jidfnu lil Luċjanu ħaj biex jeħilsu minnu. Agata wkoll tiftiehem ma’ Makarju biex jeħlisha minn Luċjanu ladarba mħabbtu kien wegħidha lil Marta. Iżda l-maħbuba tiegħu Marta toħroġ bi pjan biex issalvah.