Strada Stretta – Aktar dawl fuq it-triq li darba xeghlet il-Belt

Tfajliet kapaċi jġiegħlu l-istatwi tal-irħam jiċċaqalqu kienu bħal sireni jġennu lin-nies tas-servizz, l-aktar dawk Ingliżi, għal ġol-ħwienet u l-music halls ta’ Strada Stretta. Għall-baħrin żgħażagħ Ingliżi din x’aktarx kienet l-ewwel esperjenza ma’ nisa li mhux biss jafu jgħoddu sal-għaxra, imma kellhom ħila jimlewlhom rashom b’ħafna fantasija. Kapaċi jdaħħluhom fil-but u joħorġuhom bla ma jkunu jafu x’laqathom.

Il-ġuboks li waslet Malta f’nofs is-snin ħamsin xkanat ‘il barra l-mużika live minn Strada Stretta. U flok in-noti eleganti tal-mużika swing daħal ir-ritmu sfrenat tar-rock’n’roll b’Rock Around Clock ta’ Bill Haley & The Comets; Good Golly Miss Molly, Tutti Frutti u Lucille ta’ Little Richard; Sweet Little Sixteen ta’ Chuck Berry u Jailhouse Rock ta’ Elvis Presley, fost esponenti ta’ dal-ġeneru ta’ mużika.

Strada Stretta kienet tirbombja b’dawn id-diski. Bir-rock’n’roll flimkien mal-miġja iktar spissa tas-Sixth Fleet Amerikana fil-Mediterran, bħal qisu daħlet ferneżija ġo Strada Stretta li qalbet id-dinja ta’ taħt fuq. Id-dixxiplina ta’ qabel il-gwerra llaxkat mal-miġja tal-paċi, u fis-sittinijiet taret mar-riħ.

Dal-ktieb ikompli jirrakkonta l-istorja ta’ Strada Stretta, triq li għadha tqanqal memorji għal ħafna nies li għexu qribha. Għal oħrajn li għexu bogħod minnha jew li twieldu wara li Strada Stretta majnat, dal-ktieb itella’ s-separju fuq dinja li l-memorji tagħha jibqgħu jidwu f’moħħ kull min jaqra dwarha u jsir aktar midħla tagħha.