Għoljet il-Qasab
Paperback | Maltese
By (author): Yin Jian Ling
Din it-traduzzjoni miċ-Ċiniż għall-Malti hija t-tmienja u għoxrin traduzzjoni tal-kullana ta’ Traduzzjonijiet Faraxa taħt il-ħarsien tal-Prof. Toni Aquilina.
Għoljet il-Qasab huwa rumanz għaż-żgħażagħ u mhux-daqshekk żgħażagħ li kienet ħarġet l-awtriċi Ċiniża minn Shanghai, Yin Jian Ling fl-2016. It-titlu huwa isem ta' kulleġġ immexxi minn patrijiet fl-ewwel snin tas-seklu 20 fil-Lvant taċ-Ċina, li t-tifsira tiegħu hija L-Għolja tal-Qasab (il-forma mqassra - Għoljet il-Qasab). L-isem biċ-Ċiniż huwa "Ye Mang Po", li tfisser "L-Għolja fejn jikber il-Qasab Selvaġġ".
Il-ġrajja tal-ktieb iddur madwar tifel Ċiniż, You An, li jitlef lil ommu waqt il-ħlas, u missieru u l-mara l-ġdida tiegħu, ma jittrattawhx tajjeb. Il-mara, b’mod partikolari, issawtu u taħqru tant li t-tifel jaħrab mid-dar u jispiċċa f'orfanotrofju mmexxi mis-sorijiet. Żmien wara joħduh fil-kulleġġ ta' Għoljet il-Qasab fejn jibda jinteressa ruħu fil-pittura u fl-iskultura ...
Yin Jian Ling hija awtriċi Ċiniża magħrufa sew għall‑kotba tagħha għat‑tfal u għaż‑żgħażagħ. Twieldet fl‑1971 f’Shanghai u studjat fl‑Universitajiet ta’ Huadong u ta’ Shanghai. Hija wkoll editriċi tal‑ġurnal Xinmin wanbao.
Tikteb poeżiji, esejs, artikli, kummentarji u rumanzi. Rebħet diversi premjijiet prestiġjużi tal‑letteratura għall‑kotba tagħha, fosthom il‑Premju Chen Bochui. Fost il‑bosta xogħlijiet tagħha nsibu Nies tal‑Karti (2000), Qamar Blu fil‑Palma ta’ Jdejja (2011), Il‑Qattus fl‑Inkwatru (2011), Ħelu tal‑Menta (2013), u l‑aħħar rumanz tagħha Għoljet il‑Qasab (2016).
Stephen Cachia huwa għalliem, lettur, kittieb u traduttur. Twieled fl-1976 f'San Pawl il-Baħar u ggradwa mill-Università ta' Malta u l-Università ta' New England fl-Awstralja. Huwa għex, studja u ħadem iċ-Ċina, l-iktar f'Shangai (2010). Poeżiji u novelli tiegħu dehru f'diversi antoloġiji u ġurnali lokali. Ix-xogħol teatrali tiegħu Ilħna mill-Qiegħ ittella' fiċ-Ċentru tad-Drama fl-2003. Fl-2007 ħareġ il-ktieb tal-poeżiji Żifef u Rwiefen flimkien mal-kittieb Patrick Sammut. Jgħallem ukoll il-lingwa ċiniża u l-Istorja taċ-ċina fid-Dipartiment tal-Istudji Orjentali fl-Università ta' Malta.
See more