Nimirħu maż-Żmien

F'Nimirħu maż-Żmien, Marlene Saliba tivvjaġġa poetikament lejn il-kożmos għax tħossha parti minnu. Il-perfezzjoni li ssib fil-kożmos hija riflessa fil-vokabularju użat bl-aktar mod metikoluż. Barra l-ħsieb mirqum u l-għażla wiesgħa ta' forom metriċi, it-terminoloġija rikka toħloq versi mużikali xi waqtiet imsaħħrin bir-rima flimkien ma' għadd kbir ta' xbihat meħudin l-aktar min-natura u mill-univers bħall-kwiekeb, is-siġar, ix-xmajjar, il-baħar, is-sema u l-irjieħ. Dawn ix-xbihat huma xhieda tat-tiftixa kontinwa għall-qofol tal-eżistenza, 'il hinn minn kulma hu tranżitorju u għalhekk mhux essenzjali.

***

Meta Saliba tikkomunika b'dan il-mod, toħloq dinja mistika u sagra. Madakollu din id-dinja jgħix fiha kull bniedem komuni u jġarrabha. Iżda hija dinja eterna u infinita fl-istess ħin. Marlene Saliba hija istintiva fl-espressjoni poetika u t-toroq li sserrep fihom ilaqqgħuha xi drabi ma' nies komuni bħal Kiela, il-bejjiegħa tal-ħaxix, jew xi membru tal-familja, u drabi oħra ma' ħlejjaq li nafuhom biss mil-leġġendi preistoriċi. Il-qarrej jgħaddi minn taħlita ta' esperjenzi psikoloġiċi, reliġjużi, storiċi u l-bqija - esperjenzi li ġġarrabhom kemm iġġarrabhom, donnok dejjem qed iġġarrabhom għall-ewwel darba.

Dr Josette Attard