Mid-Dinja Ċkejkna Tiegħi - Għawdxin li għadna niftakru

B’dawn in-nies hija mimlija d-dinja ċkejkna tiegħi. Nies sempliċi u onesti. Kuntenti dejjem b’dak li għandhom! Ma jixtiequ xejn iżjed. Lanqas jekk jitteħdilhom milli jkollhom. Għalhekk, ma naħsibx li Ġużeppa ħadet għaliha meta għedtilha Ta’ Ġannpatist flok Ta’ Ġamri. Nieħu gost niddiskrivi lil min naf kif nafu! Qatt bid-dettalji ta’ xi bijografija. L-elementi ewlenin fil-kitba tiegħi huma, għalhekk, tlieta: is-sempliċità fl-istil, id-djalett li jagħti identità, u l-kwalitajiet morali u spiritwali li jagħmlu kull Għawdxi uman u bħal fid-dinja ta’ Shakespeare jkun attur li jagħmel il-parti tiegħu sewwa.