Patria

“Malli nixgħel, qalb il-platti maħmuġin kont tara għadd imdaqqas ta’ kokrowċ. Mhux wirdien tafx. Mhux minn dawk il-kannella ħoxnin. Imma dawk iż-żgħar ħafna li ‘qas huma moqżieża daqshekk. U kont maqbad l-iktar tnejn viċin u ngħaffiġhom u nħallihom għal mejta hemm fl-art jew fuq xi platt jew fuq il-bank tal-kċina. Ovvjament, sakemm jaħaarbu jistaħbew l-oħrajn, ikolli xorti noqtol erbgħa. Imma almenu naf li dejjem naqqast ftit milli hemm u naf li l-għada se noqtol tnejn oħra, u l-għada wkoll, u ma kont inħoss xejn. U taf xiex, Nathan? Avolja kont naf li jkun għad hemm ħafna moħbija bejn ix-xquq tal-bankijiet tal-kċina u taħt is-sink, kont inħossni aħjar. Ma kontx nidħol norqod qabel inneħħi ftit minn quddiem għajnejja. Kont naf ċert li qatt mhu se jiġu eliminati kollha. Imma s-sodisfazzjon li kont inħoss għax innaqqas ftit minnhom…inspjegabbli.”